პრეზიდენტი სააკაშვილი აშშ–ის სახელმწიფო მდივანს ჰილარი კლინტონს შეხვდა ნიუ–იორკში მიმდინარე გაეროს გენერალური ასამბლეის ფარგლებში, განაცხადა საქართველოს პრეზიდენტის ადმინისტრაციამ 24 სექტემბერს.

ინფორმაციის თანახმად, შეხვედრის დროს, რომელიც "ამერიკული მხარის ინიციატივით გაიმართა“, სააკაშვილმა და კლინტონმა ვაშინგტონში 6 ოქტომბერს დაგეგმილი შეხვედრა განიხილეს, სადაც "მხარეები სტრატეგიული პარტნიორობის ქარტიის ახალ ეტაპზე გადასვლის საკითხების შესახებ იმსჯელებენ“.

“ამას გარდა, საქართველოს წარმომადგენლები რამდენიმე ახალი ინიციატივითაც გამოვიდნენ, რომლებიც ეკონომიკის, განათლებისა და ჯანდაცვის სფეროებში ორმხრივი თანამშრომლობის გაღრმავებას ითვალისწინებს,“– იტყობინება პრეზიდენტის ადმინისტრაცია.